မူလတန်းကျောင်းများတွင် အိုင်တီပညာကို သင်ရိုးညွှန်းတမ်းအဖြစ် ထည့်သွင်းသင်ကြားရန် ပညာရှင်များက အကြံပြုထား

Posted by : Unknown Friday, January 10, 2014

အခြေခံပညာ မူလတန်း ပညာရေးစနစ်တွင် အိုင်စီတီနည်းပညာကို သင်ရိုးညွှန်းတမ်းများအဖြစ် ထည့်သွင်းသင်ကြားရန် အိုင်တီပညာရှင်တချို့က အကြံပြု ပြောကြားကြသည်။ မြန်မာနိုင်ငံ ကွန်ပျူတာ လုပ်ငန်းရှင်အသင်းမှ အတွင်းရေးမှူး ဦးမျိုးမြင့်ထွန်းက “နည်းပညာကို အထောက်အကူပြုထားတဲ့ သင်ရိုးညွှန်းတမ်းကြီး တစ်ခုလုံး မဟုတ်တောင် မာတီလ်မီဒီယာ ပုံစုံမျိုးနဲ့ အသံထွက် ပုံပြင်တွေ၊ အရုပ်နဲ့ အသံထွက်ပါတဲ့ စကားပြောတွေနဲ့ နည်းပညာအခြေခံ သဘောတရားကို သိအောင် လုပ်ပေးရမယ်။ သမားရိုးကျပုံစံမျိုး မဟုတ်ဘဲ နည်းပညာ အကူအညီကို ယူထားတဲ့ ပရိုဂျက်တာတို့၊ ဘာတို့နဲ့သင်ကြားမှု ပုံစံပြောင်းပစ်ရမယ်။ မူလတန်းအဆင့်မှာ သူနဲ့လိုက်တဲ့ သင်ကြားမှုပုံစံမျိုး၊ ပြီးရင် အလယ်တန်းနဲ့ အထက်တန်း အဆင့်ဆင့်သိသွားအောင် သင်ယူနိုင်ဖို့ လိုတယ်။ ကလေးက သင်ရင်းနဲ့ပဲ နည်းပညာ သဘောတရားကို သိသွားပြီး အဆိုးနဲ့အကောင်းကို နားလည်သွားမယ်။ ထိန်းတတ်သွားမယ်” ဟု ဆိုသည်။ ယင်းကဲ့သို့ သင်ကြားနိုင်ရန် နိုင်ငံတကာနှင့် ညီမျှသည့် နည်းပညာ ဆော့ဖ်ဝဲလ်များရှိနေပြီး အခြေခံပညာ သင်ရိုးအဖြစ် သင်ကြားနိုင်မည်ဆိုပါက နည်းပညာ စွမ်းရည်များတိုးမြှင့်လာ နိုင်မည်ဖြစ်ကြောင်း သိရသည်။ Myanmar ICT for Development Organizations (MIDO) မှ အမှုဆောင် ဒါရိုက်တာ ဦးနေဘုန်းလတ်က “ကျွန်တော်တို့ဆီမှာ အိုင်တီနဲ့ပတ်သက်တဲ့ သင်ရိုးမရှိဘူး။ သိသလောက်က ဆယ်တန်းလောက်မှပဲ ကွန်ပျူတာဆိုတာ ဘာလဲ၊ ဟာ့ဒစ်က ဘာလဲ ဆိုတာလောက်ပဲ သင်ကြားရတယ်။ အခြေခံ မူလတန်း အဆင့်လောက်ကတည်းက အိုင်တီနဲ့ ပတ်သက်ပြီး သင်ရိုးထဲမှာ နည်းနည်းစီ ထိတွေ့ပြီး သင်ကြားပေးနေမယ်ဆိုရင် ကလေးတွေ အနေနဲ့ အိုင်တီနဲ့ပတ်သက်တဲ့ ဗဟုသုတတွေ အစောကြီးထဲက ရှိနေမယ်” ဟု ပြောသည်။ ပညာရေးဝန်ကြီးဌာန၊ ပညာရေးစီမံကိန်းနှင့် လေ့ကျင့်ရေးဦးစီးဌာနမှ တာဝန်ရှိသူ တစ်ဦးက “မြန်မာနိုင်ငံရဲ့ အခြေခံပညာရေးမှာ မူဝါဒတွေချမှတ်ပြီး လိုအပ်တာတွေ၊ ဖြည့်ဆည်းရမယ့် သင်ရိုးတွေကို ထပ်ဖြည့်ပြီး သင်ကြားပေးဖို့တွေ ရှိပါတယ်။ နည်းပညာပိုင်းကိုလည်း သင်ကြားပေးဖို့ အစီအစဉ်ရှိပါတယ်” ဟု ပြောသည်။ ယနေ့ အခြေခံပညာ သင်ရိုးတွင် အင်္ဂလိပ်ဘာသာစကားအပြင် တိုင်းရင်းသား ဘာသာစကားနှင့် အထွေဗဟုသုတ၊ နှစ်ဆယ့်တစ်ရာစုအတွက် လိုအပ်သော ကျွမ်းကျင်မှုများ၊ အသက်မွေးဝမ်းကျောင်းဆိုင်ရာ ကျွမ်းကျင်မှုများ ထည့်သွင်း သင်ကြားပေးရန် မူဝါဒချမှတ် ဆောင်ရွက်လျက်ရှိကြောင်း ၂၀၁၄ ခုနှစ် ဇန်နဝါရီ ၉ ရက်နေ့ထုတ် ရန်ကုန်တိုင်း(မ်) ဂျာနယ်တွင် ဖော်ပြထားပါသည်။ "